Bismag: Gikahimut-an sa Aplaya Elementary School

Bismag: Gikahimut-an sa Aplaya Elementary School

Ni FELIX B. DARAY

            Mainiton ug maabiabihong pahiyom ang ilang gisugat kanako sa kanhi kong mga kaubang magtutudlo niadtong Mayo 31, 2017, dihang nahibalik ko sa Aplaya Elementary School sa Digos City Division diin ako nagretiro niadtong Enero 2012, lima ka tuig nang milabay. Apan ang gikahimut-ag maayo mao ang dalang  78 ka kopyang  Bisaya magazine nga gisaad kong  i-donate sa eskuylahan.

            “Kining mga magazine  magamit gyod sa mga Grade 2 ug Grade 3 para sa dugang basahon o supplementary reading materials sa pagtudlo, gamit ang Mother Tongue, sa karong K-12 Programa sa DepEd,” pasabot nako sa ila.

            “ Salamat gyod Sir,” tubag nila samtang nag-iyahay og bira aron makasilip sa magazine, kay matod pa nila, wa na sila karon kakita ani sa mga bookstore. “Ako man gani, molighot kog adto sa Manila Bulletin Office sa Davao aron lang makapalit labi nag naay napatik nga tampo,” ingon nako, samtang gihaw-as sa kahon.

            Akong gilain pagpinig ang mga kopya diin anaa ang akong mga sinulat, ug nag-iyahay pod silag bira aron makabasa sa akong dagang. Morag gibayanw kos kalanginan diin gidayeg ko nilag maayo dihang nabasa ang gumalaysay nga  napatik niadtong Marso 29, bahin sa nahikalimtang biyahe ni Rizal.”Bilib ko nimo Sir, writer man diay ka, daghan na kag nakuwarta ani,”matod pa ni Merlyne Baluran.

            “Salamaaat ……kaayo , ginagmay ra  pero  makalipay sad, nagsugod-sugod pa;  maayo na lang nga naay kalingawan. Sa akong pagsegig basa sa Bismag, nakakat-on kog suwat,” pamahayag nako.

            “Adto ni Sir ibutang sa library aron didto mi mohulam, aron ang tanang section makagamit ang matag usa ka bata, “ hangyo ni Michelle Cartagena, Grade 1  titser.

 “Ang akong kabenit nagtipon-og na ang mga libro ug magazine, sama sa  Bisaya, Health and Home, Enrich ug Sunstar. Misantop sa akong hunahuna ang maayo na lang i-donate  aron mabasa sa mga kabataan hasta pod sa nga titsers. Dali ra unyang makakat-on sa pagbasa ang atong mga kabataan sa Binisayang Sinugbuanon, nga mao ang Mother Tongue,” dugang pasabot  nako.

            Sa mga kauban kong titsers  kanhi, sugod sa intermidiate grades, mapinig ang mga ngalan nila: Mariegen Abrasaldo, Jenylen Punay, Cynthia Siares, Al Fernandez, Teofila Porras, Nourwena Apadan, Elsie Demaulo; sa primary grades  sila:  Irish Jade Dabalos, Michelle Cartagena, Violeta Mugot, Merlyn Baluran, Amina Iraheem, Analiza Villanueva, Renilda Jumawan, Elcita Llemit, Leah Mae Talingting , Hilda Maung, Lourdes Mampao, Anna Fe Ramos, Bethany Caballero, Clarita Dagadas; ug sa kinder si Reda Mae Quijano. Adunay pipila ka bag-ong sugob nga mga magtutudlo; ang ako rang nailhan, ang ilang principal, si Antonia Jumawan.

            Balik-lantaw sa akong kagahapon, nahiabot ko sa maong eskuylahan niadtong 1995. Nagsugod kog tudlo sa Grade 4, unya nabalhin sa Grade 6; hangtod nahimong guidance coordinator, property custodian ug OIC principal. Dinhi ko nabansay paggamit sa computer, sa pagkakat-on og gamit sa internet, kay lagi kanunayng mag-hands on sa computer. Dili nako malimtan ang principal si Erlito Damo nga nagtudlo ug mo-assist nako sa encoding ug printing sa school reports.

            Hinaot nga mapuslan gyod  sa atong mga kabataan sa Aplaya Elementary School, aron unya mahimo silang magbabasa sa  Bismag sama nako, nga sa Grade 4 pa ko, maayo na kong mobasa sa Binisaya. Ang akong  tatay man god, magpalitan kada semana og  Silaw magazine  niadtong 1958. Sa maong paagi, mahanas silag sayo sa pagbasa ug mahimong suki ang  Bisaya Magazine. Sa ingon, molawig  pag lawon ug motubo ang Bismag, sa umaabot pang katuigan.